خليني أحلم معاك!

خليني أحلم معاك .. بإيد سليمة .. تصافح إيد!
أنا دايما باحلم .. بقلب يحب .. قلب يود .. مش بيكيد!
باحلم بناس .. تنسى الإساءة .. وتغفر .. وتبدي عهد جديد!
خليني أحلم معاك!

أشوف كنيسة .. منارة عالية .. تنوَّر .. وسط قلب الليل!
تحمل أمانة .. تتممها .. تسلمها .. لجيل ورا جيل!
ووسط امتحانها .. تطلب مشورة ... ويكون الجواب إنجيل!
خليني أحلم معاك!

باحلم بفيض وغمر من السما .. يفيض فينا .. يغطينا!
لا نشوف فلان .. ولا علّان .. لكن بس وسطينا ..
يظهر يسوع .. وسط الكل .. فوق الكل .. في عنينا!
خليني أحلم معاك!

نشوف مع بعض .. أمواج الخطاة .. راجعة لحضن الآب!
تايبة ونادمة .. عابدة وخاشعة .. والمجد على الأبواب!
تعيش "الكتاب" .. بالحقيقة .. بكل الجد .. مش ألعاب!
خليني أحلم معاك!

دي بس لمحة .. كَتبْتها .. وثبتّها .. ونقشتها .. وحفرت!
باحلم بمنتدى مسيحي .. في البيت .. في الكنيسة .. في "النت!"
فيه الحوار مفتوح .. صادق أمين .. بين الراجل والست!
ممكن أحلم معاك؟!!!